Psa 59 | NdeIBE | STEP | Kumqondisi wokuhlabela. Itshuni ethi, “Ungabhidlizi.” ElikaDavida. Imikithami. Ngesikhathi uSawuli ethume amadoda ukuqaphela indlu kaDavida ukuze bambulale. Ngikhulula ezitheni zami, hawu Nkulunkulu; ngivikela kulabo abangivukelayo.

Psalms 59

Kumqondisi wokuhlabela. Itshuni ethi, “Ungabhidlizi.” ElikaDavida. Imikithami. Ngesikhathi uSawuli ethume amadoda ukuqaphela indlu kaDavida ukuze bambulale.

1 Ngikhulula ezitheni zami, hawu Nkulunkulu; ngivikela kulabo abangivukelayo.

2 Ngikhulula kubenzi bobubi ungisindise ebantwini abomele igazi.

3 Ake ubone ukuthi bangicathamela njani! amadoda esabekayo angakhela amacebo kungelacala loba isono engisenzileyo, O Jehova.

4 Angonanga lutho, kodwa balungele ukungihlasela. Phakama ungisize; ake ubone umumo engikuwo!

5 O Nkulunkulu Somandla, Nkulunkulu ka-Israyeli, ake uzivuse wena ukuze uzijezise zonke izizwe; ungabazweli isihawu bonke abahlamuki ababi.

6 Bathi bephenduka kusihlwa babe behwabha njengezinja, bahwede bebhoda ledolobho.

7 Ake ubone ukuthi baphihlizani emilonyeni yabo – baphihliza izinkemba ezindebeni zabo, bese besithi, “Ngubani osizwayo?”

8 Kodwa wena, O Jehova, uyabahleka; uyazigqabhazela zonke lezozizwe.

9 Hawu Mandla ami, ngiyakulindela; wena, O Nkulunkulu, uyinqaba yami,

10 Nkulunkulu wami olothando. UNkulunkulu uzahamba phambi kwami angenze ngiklolode phezu kwalabo abangingcolisayo.

11 Kodwa ungababulali, O Jehova hawu lethu, funa abantu bakithi bakhohlwe. Ngamandla akho yenza baphumputheke njalo ubehlule.

12 Ngenxa yezono zemilomo yabo, ngenxa yamazwi ezindebe zabo, kababanjwe belokhu bezigqaja benjalo. Ngenxa yezethuko lamanga abawaqambayo,

13 babhuqe ngolaka, babhuqe bangabi khona futhi. Lapho-ke kuzakwaziwa lasemikhawulweni yomhlaba ukuthi uNkulunkulu uyabusa phezu kukaJakhobe.

14 Bathi bephenduka kusihlwa babe behwabha njengezinja, bahambahambe becathama edolobheni.

15 Bayazula bedinga ukudla bahlabe umkhulungwane uma bengasuthanga.

16 Kodwa mina ngizahlabelela ngihaya amandla akho, ekuseni ngizahlabelela ngihaya amandla akho, ngokuba wena uyinqaba yami, isiphephelo sami ezikhathini zokuhlupheka.

17 O wena Mandla ami, ngihlabelela indumiso kuwe; wena, O Nkulunkulu uyinqaba yami, Nkulunkulu wami olothando.